СИЛАИ РАҲМ УМРНИ ЗИЁДА ҚИЛАДИ
19 март 2020 й.
«орқага
1226 марта ўқилди.
СИЛАИ РАҲМ УМРНИ ЗИЁДА ҚИЛАДИ
Анас ибн Молик розияллоҳу анҳудан ривоят қилинади: "Расулуллоҳ соллаллоҳу алайҳи васаллам: "Ким ризқининг кенг қилиб берилишини ёки ажалининг кечга сурилишини истаса, силаи раҳм қилсин", - дедилар".
Демак, силаи раҳм қилган, қариндош-уруғларига яхшилик қилган, ёрдам берган, хайр-эҳсон қилган одамнинг ризқини Аллоҳ таоло кенгайтириб, бойлигини зиёда қилиб қўяр экан. Шу билан бирга, умрини узайтириб, ундан яхши хотира, эсдалик қолишини таъминлар экан. Ушбу ҳол, силаи раҳмнинг бу дунёда ҳам фойда беришини кўрсатади.
Четдан қараганда, силаи раҳм қилинса, қариндошига ёрдам берса, моли ёки пули камайиб қолгандек кўринади. Лекин, Аллоҳ таоло бунинг эвазига унинг молини кўпайтириб берар экан ҳамда у банданинг яхшилик билан эсланиб юришини таъминлар экан.
Абдурраҳмон ибн Авфдан ривоят қилади: "Расулуллоҳ соллаллоҳу алайҳи васалламнинг шундай деганларини эшитдим: "Аллоҳ азза ва жалла: "Мен Роҳманман. Раҳимни Мен яратганман ва унга Ўз исмимдан исм қўйганман. Ким уни боғласа боғлайман ким уни узса, узаман", - деган".
Бу ҳадиси қудсийда Расулуллоҳ соллаллоҳу алайҳи васаллам қариндошлик алоқаларини боғлаш ва кесиш оқибатлари ҳақида Аллоҳ таоло айтган сўзларни баён қилиб бермоқдалар.
Силаи раҳм ана шундай фазилатли нарса экан. Ҳар бир мўмин-мусулмон ана шу фазлдан умидвор бўлиб, бу ишда бардавом бўлиши керак.
"Ал-адаб ал-муфрат" китобидан.
Ромитан туман “Мулло Нарзи” жомеъ масжид
имом - хатиби Суннат Фахриев
